Neste estudo froito dun amplo traballo de investigación etnográfica, o autor achega as realidades e a importancia que para a poboación supoñen as festas e rituais que na provincia de Ourense se desenrolan durante o período da invernía. Situacións que contan cun forte arraigo e se asentan nunha tradición transmitida de xeración en xeración, resultando ser un dos grandes tesouros que garda o excelso patrimonio inmaterial galego.

Fundamentado nun arduo traballo de campo, no que aparecen representados o 60% dos concellos da provincia, e cun alcance en 150 núcleos de poboación, esta monografía fai un percorrido polas orixes, características e desenvolvemento das celebracións de nadal, festas ígneas, romarías e do ciclo de entroido. En definitiva, por todos os elementos e situacións que resultan ser altamente significativos para a configuración desta identidade.

Amósase un catálogo de máscaras, personaxes e rituais que conforman o folclore destas festas, afondando en cada un deles dun xeito descritivo, histórico, evolutivo e parando no que significan tanto de xeito individual como no colectivo do que forman parte. Establecendo asimesmo paralelismos con situacións análogas que aparecen noutros lugares do mundo, e emprendendo unha viaxe que nos leva pola celebración destos rituais ao longo da historia. 

Aquí fican relatos, informantes, testemuñas, vellas cantigas e gran variedade de situacións que durante moitos invernos lle deron pulo ás relacións interpersoais, e a unha realidade social que olla a estas celebracións como un xeito de vida.