2016 foi o ano no que as Letras Galegas foron adicadas a este poeta da Terra Chá nado en Outeiro de Rei. E para homenaxear ao ilustre defensor da cultura galega, ideamos un proxecto conxunto que compartín con Luís Correa "O Caruncho", ao que demos en chamar "Sentindo a Manuel María".

Luís interpretaba poemas do autor acompañando a  voz co son da súa zanfona, os cales eran explicados mediante unha introdución didáctica que eu ía lendo previamente; todo mesturado coa voz en off do propio Manuel María recollidas en gravacións que o poeta deixara en diferentes aparacións en radio, das que eliximos as que facían referencia os temas tratados nos poemas interpretados.

O programa da nosa actuación incluía as seguintes composicións: A gaita, As árbores da cidade, Soneto de Outono, Galiza, O Carro, Florencio da Fontaneira, Canción para cantar todos os días e O soñador.